DIE OMGEWING – Paulandi Vakansie Akkommodasie Besprekings +27 (72) 739-2678

Daar is baie om te doen en te sien, nie net binne die grense van Leeupoort Vakansiedorp en die 823 Ha wildkamp nie, maar ook in die omliggende gebiede en dorpe rondom Leeupoort. In die skyfievertoning hieronder lys ons net ‘n paar van die vele kenmerke en besienswaardighede wat vir besoekers beskikbaar is.

Plaas jou muis oor die skyfievertoning om dit te onderbreek, jy kan ook op
die linker- of regter pyltjie klik om vorentoe te beweeg of terug te spoor.

Leeupoort Vakansiedorp is geleë binne ‘n geproklameerde natuurrerservaat en bestaan uit ongeveer 1,200 woonerwe met ongeveer 550 inwoners wat permanent hier bly. Die dorp beskik oor grondpaaie en die spoedbeperking in Leeupoort is 25 km/h.
By die ingangshekke na Leeupoort is Leeukrans geleë met ’n swembad, 'n winkel wat in basiese benodigdhede kan voorsien, asook ‘n drankwinkel, 'n kroeg en 'n à la carte restaurant.
‘n Toegangsfooi per persoon per dag is van toepassing vir die gebruik van die Leeukrans swembad en is betaalbaar by die winkel. Wegneem etes en drankies kan by Leeukrans kroeg en restaurant bestel word en daar is ook braaigeriewe, tafels en stoele langs die swembad.
Die winkel by Leeukrans voorsien in die basiese benodighede en verkoop onder andere Boskos waarmee jy die verskeidenheid diere en bokke kan voer.
Die drankwinkel by Leeukrans is ‘n kleinhandel winkel wat Leeupoort Vakansiedorp voorsien van alkoholiese drank.
Leeukrans restaurant is à la carte en beskik ook oor 'n volledige kroeg met ‘n verskeidenheid nie-alkoholiese en alkoholiese drankies. Die spyskaart bied 'n verskeidenheid van voorgeregte, hoofgeregte, nageregte; en daar word voorsiening gemaak vir ontbyt en middagetes, asook ligte etes.
Eden is ‘n plekkie van salige stilte tussen die bome waar jy rustig op ‘n bankie kan sit en die natuur geniet. Vanaf die jukskeibane stap jy rigting suid oor dié bruggie om by Eden uit te kom.
Die dorp se dam, ook bekend as die Eendedam, is geleë in Clivia paadjie. Hier is ‘n bankie onder ‘n afdak waar jy kan sit en die natuurskoon geniet terwyl jy kyk hoe die wild in die dorp kom water drink.
Die sonsondergang uitkykpunt is geleë op die hoek van Kieriklapper- en Karee paadjie. Dis hier waar jy pragtige Bosveld sonsondergange kan geniet en jou net verlustig in die tasbare stilte wat rondom jou heers.
By die uitkykpunt in die 823 ha wildskamp kan jy ver kyk oor die Bosveld in Thabazimbi se rigting. Die pad is baie klipperig en kan stadig deur ‘n gewone motor aangedurf word, alhoewel ‘n 4x4 voertuig eerder aanbeveel word. Die asemrowende uitsig maak wel op vir die pad.
Die grootste Huilboom (Peltophorum africanum) in Suid Afrika is geleë in die 823 ha wildskamp in Leeupoort Vakansiedorp. Die boom se takke drup water in die lentemaande as die skuimbesies (Ptyelus grossus) aan die takke of jong lote suig. Hier kan jy rustig op die bankie sit omring deur die Bosveld natuurskoon.
Die Bosdam is geleë in die 823 ha wildskamp in Leeupoort Vakansiedorp en 'n verskeidenheid van wild en voël spesies kan hier waargeneem word. Onthou dat Leeupoort Vakansiedorp is 'n geproklameerde natuurreservaat – visvang en jag is streng verbode.
Vir die stap, draf en hardloop entoesiaste het Leeupoort Vakansiedorp sy eie Parkrun op Saterdae. Dit is natuurlik 'n moet vir Parkrun fundies wat wil spog met al die verskillende plekke waar hulle al deelgeneem het.